Kujtesa kolektive rreth aspekteve kufitare në trevën e Opojës dhe të Gorës gjatë viteve 1945-1966

Abstrakti

Në këtë punim do të trajtojmë disa aspekte të kufijve në rajonet e Opojës dhe Gorës, territore këto që kufizohen me Shqipërinë dhe Maqedoninë e Veriut. Popullsia e Opojës është shqiptare, ndërsa ajo e Gorës është kryesisht gorane-boshnjake. Në fokus të kësaj kumtese do të jetë periudha pas Luftës së Dytë Botërore deri në vitin 1948, kur marrëdhëniet ndërmjet Jugosllavisë dhe Shqipërisë ishin të mira. Po ashtu, do të shtjellohet edhe periudha pas vitit 1948, kur gjendja ndërmjet dy vendeve filloi të tensionohej, dhe popullsia e fshatrave kufitare kishte më shumë sfida pasi ata ishin të mbikëqyrura nga të dy anët e kufirit. Në Kosovë, periudha ndërmjet viteve 1945-1966 njihet në kujtesën e popullsisë si periudha e Rankoviçit, e cila është identifikuar sipas udhëheqësit të atëhershëm serb në Ministrinë e Punëve të Brendshme të Jugosllavisë. Hulumtimi ynë bazohet në intervista, të cilat i kemi realizuar më herët në këto hapësira, dhe trajtojnë kryesisht incidente, kalime ilegale, etj.