Episode dhe fragmente të jetës së përditshme të arbërve në qytete

Abstract

Ky artikull është një punim në trajtë të një përmbledhje kapjesh sporadike të një mori episodesh dhe fragmentesh nga historia e përditshmërisë së arbërve, veçanërisht në shekujt e mbramë të Mesjetës. Si jetonin arbërit në përditshmëri në qendrat e tyre urbane dhe çfarë i përshkonte ditët e tyre të zakonshme? Duke u nisur nga koncepti “Alltagsgeschichte”, i konceptuar dhe i popullarizuar nga një grup historianësh gjermanë në dy dekadat e fundit të shek. XX, ky punim është një sprovë mikrohistorie, e shtruar përmes gërmimesh ndër burime shkrimore dhe pamore, për të nxjerrë të dhëna mbi ngjarje të rëndomta, të njerëzve të rëndomtë, në ditë të rëndomta ndër arbër nëpër qytete. Cilat ishin panoramat etnike dhe larushia etnolinguale e banorëve të këtyre qyteteve? Me çfarë aktivitetesh ekonomike merreshin arbërit dhe si bëhej shkëmbimi tregtar? Çfarë besonte një arbër i zakonshëm dhe çfarë e përkufizonte botën e tij? Cilat ishin shqetësimet kryesore të arbërve dhe çfarë i mbushte ditët, muajt, vitet dhe jetët e përditshme të arbërve që jetonin në qytete? Çfarë ritme kohore e karakterizonin jetën e arbërve dhe sa intensive ishte jeta e tyre? Si informoheshin dhe si udhëtonin arbërit brenda territoreve dhe jashtë territoreve të tyre? Ky artikull është një panorama e tekstualizuar në miniaturë e jetës së përditshme të arbëve nëpër qytete, me tërë banalitetet e saj, duke renditur ngjarje nga jeta tregtare dhe detaria, skllavëria dhe prostitucioni, besimet fetare dhe ndërveprimet e arbërve mes tyre dhe me të tjerët, çdo ditë, në përditshmëri!